חולין 193:1

שאני חלב דמפעפע

ובחלב אסור

והאמר רבה בר בר חנה

עובדא הוה קמיה דר' יוחנן בכנישתא דמעון בגדי שצלאו בחלבו ואתו ושיילוה לרבי יוחנן ואמר

קולף ואוכל עד שמגיע לחלבו

ההוא כחוש הוה

רב הונא בר יהודה אמר

כוליא בחלבה הוה ושריא

רבין בר רב אדא אמר

כילכית באילפס הוה ואתו שיילוה לרבי יוחנן ואמר להו

ליטעמיה קפילא ארמאה

אמר רבא

מריש הוה קא קשיא לי הא דתניא קדרה שבשל בה בשר לא יבשל בה חלב ואם בשל בנותן טעם

תרומה לא יבשל בה חולין ואם בשל כנותן טעם

בשלמא תרומה טעים לה כהן אלא בשר בחלב מאן טעים ליה

השתא דאמר רבי יוחנן

סמכינן אקפילא ארמאה הכא נמי סמכינן אקפילא ארמאה

דאמר רבא

אמור רבנן בטעמא ואמור רבנן בקפילא